આ પણ વાંચો ટ્રેન્ડિંગ સમાચાર
કોર્પોરેશનની એસ્ટેટ અને ટાઉનપ્લાનિંગ શાખા દ્વારા
ઓરડી અને લાકડાની લાટી સહિતના દબાણ પર બુલડોઝર ફેરવી ૨૭૦ મીટર જગ્યા ખુલ્લી કરાઇ
ગાંધીનગર : ગાંધીનગરના પેથાપુર વિસ્તારમાં ટ્રાફિકની સમસ્યા હલ કરવા
માટે બની રહેલા નવા ઓવરબ્રિજની કામગીરીમાં નડતરરૃપ દબાણો પર આજે તંત્રનું બુલડોઝર
ફરી વળ્યું હતું. ગાંધીનગર મહાનગરપાલિકાની એસ્ટેટ શાખા અને ટાઉન પ્લાનિંગ શાખાએ
સંયુક્ત ઓપરેશન હાથ ધરીને સવસ રોડમાં અવરોધ ઊભી કરતી ૨૭૦ ચોરસ મીટર જેટલી જગ્યા
ખુલ્લી કરાવી છે.
પેથાપુર વિસ્તારમાં બની રહેલા ઓવરબ્રિજની કામગીરી છેલ્લા
કેટલાય સમયથી ચાલી રહી છે. બ્રિજની નીચે અને તેની આસપાસના વિસ્તારમાં
વાહનવ્યવહારની સરળતા માટે સવસ રોડ બનાવવો અનિવાર્ય હતો. જોકે, ૨૭૦ ચોરસ મીટરના
પ્લોટમાં થયેલા બાંધકામને કારણે સવસ રોડનું કામ અટકેલું હતું. સ્થાનિક તંત્ર
દ્વારા અગાઉ સૂચના આપવા છતાં જગ્યા ખાલી ન થતા, આજે મનપાની ટીમે કડક વલણ અપનાવ્યું હતું.આ ઓપરેશન દરમિયાન
જે ૨૭૦ મીટર જગ્યા કપાતમાં આવતી હતી,
ત્યાં કેટલીક ઓરડીઓનું પાકું બાંધકામ કરી દેવામાં આવ્યું હતું. આ ઉપરાંત, ત્યાં લાકડાની એક
લાટી -ડેન્સો પણ ધમધમી રહી હતી. મનપાના કાફલાએ ચુસ્ત બંદોબસ્ત સાથે સ્થળ પર પહોંચી
જેસીબીની મદદથી આ તમામ ઓરડીઓ અને ડેન્સોને તોડી પાડયા હતા. જોતજોતામાં વર્ષોથી
જામી પડેલા દબાણો દૂર કરી દેવામાં આવ્યા હતા અને સવસ રોડ માટેની કિંમતી જમીન
સંપાદિત કરી લેવામાં આવી હતી.
સામાન્ય રીતે આવા મોટા દબાણ હટાવવાની કામગીરી વખતે અનેકવાર રાજકીય
ભલામણો અને દબાણો આવતા હોય છે. પરંતુ પેથાપુરના આ કિસ્સામાં ગાંધીનગર મહાનગરપાલિકાએ
સ્પષ્ટ કરી દીધું હતું કે શહેરીજનોની સુવિધા અને ટ્રાફિકની સમસ્યાના ઉકેલ માટે કોઈ
પણ બાંધછોડ કરવામાં આવશે નહીં.
