આ પણ વાંચો ટ્રેન્ડિંગ સમાચાર
Vadodara : રોડ રસ્તા પર વાહન ચાલુ હોય વડોદરા શહેરમાં છેલ્લા કેટલાક સમયથી માર્ગ અકસ્માતોની ઘટનાઓમાં ચિંતાજનક વધારો નોંધાઈ રહ્યો છે. ટ્રાફિકનું રસ્તા પર વધતું ભારણ, દબાણ, નિયમોનો ભંગ અને બેદરકારીભર્યું વાહન ચલાવવું તેના મુખ્ય કારણો બની રહ્યા છે. ખાસ કરીને કેટલાક દ્વિચક્રી વાહન ચાલકો જાહેર માર્ગો પર જોખમી સ્ટંટ કરીને પોતાનો અને અન્યનો જીવ જોખમમાં મૂકી રહ્યા છે.
દરમિયાન દાંડિયા બજારથી અકોટા તરફ જતા બ્રિજ પર આવી જ એક ઘટના સામે આવી હતી, જેમાં ચાલુ બાઈક પર પાછળ બેઠેલો યુવક અચાનક ઊભો થઈ સ્ટંટ કરતો નજરે પડ્યો હતો. આ દરમિયાન આસપાસથી પસાર થતા અન્ય વાહનચાલકોનું ધ્યાન ભંગ થતા અકસ્માતની ભીતિ સર્જાઈ હતી. આવી હરકતો માત્ર કાયદાનું ઉલ્લંઘન જ નથી, પરંતુ નિર્દોષ લોકો માટે જીવલેણ સાબિત થઈ શકે છે.
ટ્રાફિક નિષ્ણાતોના મતે, જાહેર માર્ગો પર કોઈપણ જાતના સ્ટંટ કરવા એ ગંભીર ગુનો ગણાય છે અને તેના માટે કડક દંડ તથા લાયસન્સ સસ્પેન્ડ કરવાની જોગવાઈ છે. શહેર પોલીસ દ્વારા સમયાંતરે ડ્રાઈવ યોજાય છે, છતાં આવા બનાવો અટકતા નથી.
જાહેર જનતાએ પણ સાવચેત રહી આવી હરકતો અંગે તાત્કાલિક ટ્રાફિક પોલીસને જાણ કરવી જોઈએ, જેથી સમયસર કાર્યવાહી થઈ શકે અને શહેરમાં સલામત ટ્રાફિક વ્યવસ્થા જળવાઈ રહે. અત્રે એ નોંધવું જરૂરી છે કે, આ બાઈક વડોદરા પાર્સિંગની હોવાનું જાણવા મળ્યું હતું.
