આ પણ વાંચો ટ્રેન્ડિંગ સમાચાર
Gujarat Local Body Elections 2026: અમદાવાદ મ્યુનિસિપલ કોર્પોરેશનના 48 વોર્ડની 192 બેઠકો માટે રવિવારે (26મી એપ્રિલ) મતદાન માટે શહેર પોલીસે બંદોબસ્ત ગોઠવવા તૈયારીઓ આરંભી દીધી છે. મતદાન દરમિયાન ટોળાંશાહી કે ગરબડ કરવાની કોશિષ કરવામાં આવશે તો 3 જ મિનિટમાં પોલીસની ટુકડીઓ પહોંચી જાય તેવી વ્યવસ્થા કરાઈ રહી છે. સીસીટીવી અને ડ્રોનથી સર્વેલન્સ કરવા માટે 150થી વધુ પોલીસ ટુકડીઓનું ક્રોસ પેટ્રોલિંગ ગોઠવાશે. એસઆરપી, સીઆરપીએફ અને આરએએફને સંવેદનશીલ અને અતિ સંવેદનશીલ વિસ્તારોમાં તહેનાત કરાશે. અમદાવાદમાં ક્રાઈમ બ્રાન્ચ, એસઓજી, એટીએસ અને પીસીબીની ટીમો ઝોનદીઠ વ્યૂહાત્મક રીતે કાર્યરત કરાશે.
પૂર્વ અને કોટ વિસ્તારમાં વિશેષ સતર્કતા સાથે SRP, અર્ધલશ્કરી દળો ગોઠવાશે
રવિવારે અમદાવાદ મ્યુનિસિપલ કોર્પોરેશનની ચૂંટણી માટે મતદાન યોજાનાર છે. કુલ 48 વોર્ડમાંથી 192 નગરસેવકો ચૂંટી કાઢવા લોકશાહી ઢબે ચૂંટણી યોજાય તે માટે અમદાવાદ શહેર પોલીસે તૈયારીઓ આરંભી છે. બંદોબસ્ત સંદર્ભે મીટિંગ બાદ મહત્ત્વના નિર્ણયો લેવાયાં હતાં. શહેરના દરેક સેક્ટર અને ઝોનમાં પોલીસ કર્મચારી જે પોલીસ સ્ટેશનમાં કાર્યરત હોય તેના બદલે બીજા પોલીસ સ્ટેશનમાં જ ચૂંટણી બંદોબસ્ત ફાળવવા સહિતના નિર્ણયો લેવામાં આવ્યા છે. સીસીટીવી ઉપરાંત જરૂર જણાયે ડ્રોનથી નજર રાખશે. શહેર પોલીસની 50 ક્વિક રિસ્પોન્સ ટીમ અને 100 સેક્ટર પેટ્રોલિંગ ટીમ મળીને કુલ 150 જેટલી ટીમો ક્રોસ પેટ્રોલિંગ કરશે. કોઈપણ મતદાન મથકમાં, બહાર કે આસપાસ ટોળાંશાહી કરવામાં આવશે અથવા તો વાતાવરણ ડહોળવાની કોશિષ કરવામાં આવશે તો ત્રણ જ મિનિટમાં પોલીસની ટુકડીઓ પહોંચી જાય તેવું આયોજન કરાયું છે.
આ પણ વાંચો: અમદાવાદ: બાપુનગરમાં યુવકે દાદાગીરીનો વિરોધ કર્યો તો ચાની કીટલી પર આંતરી હિચકારો હુમલો, CCTVમાં દ્રશ્યો કેદ
અમદાવાદમાં કુલ 4257 મતદાન મથકો ઉપર 38 લાખ મતદારો મતદાન કરશે, ત્યારે ગેરરીતિ ટાળવા અને ક્રોસ પેટ્રોલિંગ ગોઠવવાની સાથે જ સીસીટીવી અને જરૂર જણાય તે વિસ્તારમાં ડ્રોનથી સર્વેલન્સ રાખવાના આયોજનો શહેર પોલીસે આરંભ્યા છે. આજે સોમવારે શહેર પોલીસના ઉચ્ચ અધિકારીઓની ચૂંટણી બંદોબસ્ત સંદર્ભે મીટિંગ યોજાઈ હતી. શહેરમાં કુલ 4257 મતદાન મથક ઉપર મતદાન થવાનું છે તેમાંથી પશ્ચિમ વિસ્તારના ખૂબ ઓછા મતદાન મથકો અને બુથ સંવેદનશીલ મનાય છે. ખાસ કરીને પૂર્વ અને કોટ વિસ્તારના અંદાજે પોણા બસો મતદાન બુથ અતિ સંવેદનશીલ અને બે હજાર જેટલા સંવેદનશીલ બુથ બહાર શહેર પોલીસે બંદોબસ્ત ગોઠવ્યો છે.
કોરોના પછી અમદાવાદમાં સૌથી ઓછું 37.8 ટકા મતદાન હતું, આ વખતે વધવાની શક્યતા
અમદાવાદ મ્યુનિસિપલ કોર્પોરેશનની આ અગાઉની ચૂંટણી વર્ષ 2021માં કોરોનાના બીજા ઘાતક તબક્કાના થોડા મહિનાઓ પછી યોજાઈ હતી. એ સમયે રાજ્યની મહાનગરપાલિકાઓમાં સૌથી ઓછું 37.8 ટકા મતદાન અમદાવાદ મહાનગરપાલિકાનું રહ્યું હતું. સુરત અને વડોદરામાં 42.1, રાજકોટ 43.7, ભાવનગરમાં 42.8 અને સૌથી વધુ જામનગર મહાપાલિકામાં 45.4 ટકા મતદાન થયું હતું.
અમદાવાદમાં વર્ષ 2021ના કંગાળ મતદાનના કારણે પોલીસ અને ચૂંટણી કામગીરી સાથે સંકળાયેલા કર્મચારીઓ માટે દિવસ પસાર કરવો કઠિન થયો હતો. વર્ષ 2021ની સરખામણીએ આ વખતે ગરમી છતાં મતદાનનો આંક વધશે તેવી ધારણા વ્યક્ત થઈ રહી છે.
