આ પણ વાંચો ટ્રેન્ડિંગ સમાચાર
Ahmedabad News: અમદાવાદના ગોમતીપુર વિસ્તારમાં પ્રેમલગ્ન કરનાર એક મહિલાને પસ્તાવાનો વારો આવ્યો આવ્યો છે. સીમા સુરક્ષા બળ (BSF)માં કોન્સ્ટેબલ તરીકે બિહાર ખાતે ફરજ બજાવતા પતિએ પત્નીના નામે લોન લઈને તેમજ સાસરિયા પક્ષ પાસેથી દેવું ચૂકવવાના બહાને લાખો રૂપિયા પડાવ્યા હતા. આ રૂપિયા દેવું ભરવાને બદલે પ્રેમિકા પાછળ વાપરી નાખી, પત્નીને માર મારી ઘરની બહાર કાઢી મૂકતા આખરે મામલો પોલીસ સ્ટેશને પહોંચ્યો છે.
ગોમતીપુરમાં રહેતી 31 વર્ષીય મહિલાએ આ અંગે ગોમતીપુર પોલીસ સ્ટેશનમાં પોતાના પતિ વિરુદ્ધ ગુનો નોંધાવ્યો છે. ફરિયાદ અનુસાર, મહિલાને યુવક સાથે પ્રેમ થતાં 12 વર્ષ પહેલાં તેમણે લગ્ન કર્યા હતા. લગ્નજીવન દરમિયાન પતિ બિહાર ખાતે ફરજ બજાવતો હતો. તેણે પોતાની પર મોટું દેવું થઈ ગયું હોવાનું કહીને પત્નીનો વિશ્વાસ જીત્યો હતો.
પતિની વાતોમાં આવી જઈને મહિલાએ પોતાના નામે લોન લીધી હતી અને પોતાના પરિવારજનો પાસેથી પણ આર્થિક મદદ મેળવીને કુલ 7.55 લાખ પતિને આપ્યા હતા. જો કે, આ રકમથી દેવું ચૂકવવાને બદલે પતિએ તમામ રૂપિયા પોતાની પ્રેમિકા પાછળ ઉડાવી દીધા હતા. આ બાબતની જાણ થતાં જ્યારે પત્નીએ વિરોધ કર્યો, ત્યારે પતિએ તેને ઢોર માર મારીને ઘરમાંથી કાઢી મૂકી હતી અને છૂટાછેડા આપવા માટે દબાણ કરી રહ્યો હતો. હાલ ગોમતીપુર પોલીસે આ મામલે ગુનો નોંધીને વધુ તપાસ હાથ ધરી છે.
