આ પણ વાંચો ટ્રેન્ડિંગ સમાચાર
Gujarat Asha Worker Strike 2026: ગુજરાતમાં પોલિયો નાબૂદીના અભિયાનમાં વર્ષોથી સંપૂર્ણ નિષ્ઠા અને ઈમાનદારીપૂર્વક ફરજ બજાવતી આશા વર્કર બહેનો આજે સરકારની ઉદાસીનતા અને શોષણ નીતિ સામે આરપારના મૂડમાં આવી ગઈ છે. છેલ્લા 4 મહિનાથી હક્કનું માસિક ઇન્સેન્ટિવ ન મળવાને કારણે અને આકાશને આંબતી મોંઘવારી વચ્ચે પણ ભથ્થામાં કોઈ જ વધારો ન થતાં, ‘ગુજરાત આશા વર્કર યુનિયન’ દ્વારા વાવ થરાદ કલેક્ટરને આવેદન પત્ર પાઠવવામાં આવ્યું છે. આ સાથે જ આગામી પોલિયો કામગીરીનો સંપૂર્ણ બહિષ્કાર કરી 3 દિવસની હડતાળ પર ઉતરવાની સત્તાવાર જાહેરાત કરવામાં આવી છે.
માત્ર 100 રૂપિયામાં 10 કલાક વૈતરૂં
યુનિયનના પ્રમુખ પિંકીબેન કે. પરમારે આવેદન પત્રમાં ઉગ્ર આક્રોશ વ્યક્ત કરતા જણાવ્યું છે કે, શરૂઆતના વર્ષોમાં માત્ર 75 રૂપિયા જેટલા નજીવા ઇન્સેન્ટિવથી કામ શરૂ કરીને આશા બહેનોએ ગુજરાતના લાખો બાળકોના ભવિષ્યને સુરક્ષિત રાખ્યું છે. તેમણે ગામડે-ગામડે, ઘેર-ઘેર અને અંતરિયાળ વિસ્તારોમાં ભટકીને તેમજ સ્થળાંતર કરતા પરિવારોના બાળકોને શોધી શોધીને પોલિયોની રસી પીવડાવી છે. આશા બહેનોની આ અથાક મહેનતનું જ પરિણામ છે કે આજે ગુજરાત સંપૂર્ણપણે પોલિયો મુક્ત બનવાનું ગૌરવ પ્રાપ્ત કરી શક્યું છે. પરંતુ અત્યંત દુઃખ સાથે જણાવવું પડે છે કે આ ગૌરવ અપાવનાર બહેનોની ફિક્સ વેતન કે લઘુત્તમ વેતન લાગુ કરવાની વર્ષો જૂની પડતર માંગણીઓ પર સરકારે પાણી ફેરવી દીધું છે. હાલના સમયમાં આશા બહેનો પાસે સવારે 7:00 વાગ્યાથી સાંજના 5:00 વાગ્યા સુધી સતત 10 કલાક પોલિયોની કપરી કામગીરી કરાવવામાં આવે છે, જેના બદલામાં માત્ર 100 રૂપિયા જેવી મામૂલી રકમ ચૂકવાય છે. એક તરફ રાંધણગેસ, ખાદ્યતેલ, દાળ-શાકભાજી, કઠોળ અને દૂધના ભાવ આસમાને પહોંચ્યા છે, ત્યારે દિવસના માત્ર 100 રૂપિયાના ઇન્સેન્ટિવમાં આટલી સખત કામગીરી કરાવવી એ સદંતર અન્યાયી અને શોષણયુક્ત છે.
ચાર મહિનાથી ઇન્સેન્ટિવ બાકી: આશા વર્કર યુનિયન
તેમાં પણ પડતા પર પાટું એ છે કે આ મામૂલી માસિક ઇન્સેન્ટિવ પણ છેલ્લા 4 મહિનાથી ચૂકવવામાં આવ્યું નથી, જેના કારણે ગરીબ આશા બહેનોના પરિવારોની સ્થિતિ અત્યંત દયનીય બની ગઈ છે. યુનિયનની માંગ છે કે છેલ્લા 4 મહિનાથી અટકાવી રાખવામાં આવેલ તમામ માસિક ઇન્સેન્ટિવની તુરંત અને સમયસર ચૂકવણી કરવામાં આવે. તેમજ વધતી જતી અસહ્ય મોંઘવારીને ધ્યાનમાં રાખીને પોલિયો સહિતની આરોગ્યલક્ષી તમામ કામગીરીના ઇન્સેન્ટિવમાં સન્માનજનક અને યોગ્ય વધારો કરવામાં આવે.
આ પણ વાંચો: 15 દિવસના વિરામ બાદ આગળ વધ્યું ચોમાસું: રાજસ્થાનમાં કરાં પડ્યા, મેઘાલયમાં આભ ફાટ્યું
મોંઘવારી વધે ત્યારે તેની સામે વેતન પણ વધવું જ જોઈએ એ નારા સાથે યુનિયન દ્વારા રેલીની પણ મજૂરી માંગવામાં આવી હતી પણ તંત્ર દ્વારા તેની પણ મંજૂરી ન મળતા હવે આશા વર્કર યુનિયને ચીમકી ઉચ્ચારી છે કે જો સરકાર દ્વારા આ પડતર માંગણીઓનો તાકીદે ન્યાયી નિકાલ લાવવામાં નહીં આવે, તો આશા બહેનો દ્વારા પોલિયો કામગીરીનો સંપૂર્ણ બહિષ્કાર કરી વિરોધ પ્રદર્શન ચાલુ રાખશે.
