આ પણ વાંચો ટ્રેન્ડિંગ સમાચાર
પ્રોટીનનો અદ્ભૂત સ્ત્રોત કઠોળ, સામાન્યથી સર્વોત્તમ આહાર : રાજ્યમાં 21.52 લાખ સહિત દેશમાં 252 લાખ ટન કઠોળનું ઉત્પાદન : ચીન,અમેરિકા સહિત દેશોમાં ભારતીય કઠોળની માંગ
રાજકોટ, : આવતીકાલે ‘સામાન્યથી સર્વોત્તમ આહાર ‘ના મધ્યવર્તી વિચાર સાથે વિશ્વ કઠોળ દિવસ ઉજવાશે. ગુજરાતીઓ સહિત દેશભરના રૂટીન ખોરાકમાં ચોખા-ઘંઉ વધારે ખવાતા રહ્યા છે ત્યારે કઠોળમાં ચોખા કરતા ત્રણ ગણુ અને ઘંઉથી બમણું પ્રોટીન હોય છે.ગુજરાતમાં પાંચ વર્ષમાં તુવેર, મગ, મઠ અને ખાસ કરીને ચણા સહિત કઠોળનું ઉત્પાદન આશરે બમણું થઈ ગયું છે.
શરીર માટે અત્યંત જરૂરી પ્રોટીનનો મહત્વનો સ્ત્રોત એવા કઠોળનું ઉત્પાદન ગુજરાતમાં પાંચ વર્ષ પહેલા 10.58 લાખ ટન, ઈ.સ.2023-24માં 14.25 લાખ ટન થયું હતું તે સામે ગત વર્ષ ઈ.સ. 2024-25માં આશરે ૩૫ ટકાના વધારા સાથે 21.52 લાખ ટને અને આ સાથે સમગ્ર દેશનું કઠોળ ઉત્પાદન પણ 252 લાખ ટને પહોંચ્યું છે. ભારત ચીન, અમેરિકા, યુ.એ.ઈ., યુ.એસ.એ., શ્રીલંકા, બાંગ્લાદેશ સહિત દેશોમાં કઠોળની નિકાસ કરે છે અને વિદેશોમાં દેશના કઠોળની પહેલેથી માંગ રહી છે.
ગુજરાતમાં તુવેર અને અડદનું વાવેતર ચોમાસામાં, મગ અને મઠનું વાવેતર ચોમાસા અને શિયાળા (ખરીફ અને રવી) બન્ને ઋતુમાં જ્યારે કઠોળમાં મુખ્ય પાક ગણાતા ચણાનું વાવેતર શિયાળામાં કરાય છે. ચણાને બાદ કરતા ચાલુ વર્ષ ઈ.સ.2025-26માં તુવેર,અડદ, મગ,મઠ સહિતના કઠોળનું 4.85 લાખ ટન ઉત્પાદનનો અંદાજ છે. જ્યારે ચાલુ વર્ષે ચણાનું વાવેતર પણ વધ્યું હોય તેનો પણ મબલખ પાક થશે.
