આ પણ વાંચો ટ્રેન્ડિંગ સમાચાર
– પેટ્રોલ અને ડીઝલના ભાવ નહીં વધે : કેન્દ્ર સરકાર
– ઘરેલુ રાંધણ ગેસના સિલિન્ડરની કિંમત રૂ. 913 જ્યારે કમર્શિયલ સિલિન્ડરનો ભાવ 1883 થયો
નવી દિલ્હી : પશ્ચિમ એશિયામાં યુદ્ધના કારણે ઊભી થયેલી ક્રૂડ ઓઈલની કટોકટી વચ્ચે સરકારે રાંધણ ગેસના ભાવમાં જંગી વધારો કરતા જનતામાં ભારે રોષ જોવા મળી રહ્યો છે. આ સમયે કેન્દ્ર સરકારે આ જંગી ભાવ વધારાનો લૂલો બચાવ કરતા કહ્યું કે, વૈશ્વિક ઊર્જા દરોમાં વધારાના કારણે રાંધણ ગેસના ભાવમાં વધારો કરાયો છે. જોકે, પેટ્રોલ અને ડીઝલના ભાવમાં કોઈ વધારો નહીં થાય.
સરકારી ઓઈલ કંપનીઓ પાસે ક્રૂડ ઓઈલનો પર્યાપ્ત જથ્થો છે અને સરકારી ઓઈલ કંપનીઓ પેટ્રોલ-ડીઝલનો નાણાકીય બોજ વહન કરવા સક્ષમ છે. જોકે, રાંધણ ગેસના ભાવમાં કરાયેલા જંગી વધારાના બચાવમાં સરકારી સૂત્રોએ જણાવ્યું કે, પ્રત્યેક ઘરમાં વર્ષે સરેરાશ ૪-૫ સિલિન્ડરનો વપરાશ થાય છે. એ બાબતને જોતા ચાર વ્યક્તિના પ્રત્યેક પરિવાર પર દૈનિક માત્ર ૮૦ પૈસા અથવા પ્રતિ વ્યક્તિ માત્ર ૨૦ પૈસાનો વધારો થયો છે. આ વધારા છતાં ભારતમાં એલપીજીનો ભાવ પડોશી દેશો કરતા ઓછો છે. ભારતમાં ૧૪.૨ કિલોના રાંધણ ગેસના સિલિન્ડરનો ભાવ રૂ. ૧,૦૫૦થી નીચે છે જ્યારે પડોશી દેશોમાં નેપાળમાં તેનો ભાવ રૂ. ૧,૨૦૭, શ્રીલંકામાં રૂ. ૧,૨૪૧ અને પાકિસ્તાનમાં રૂ. ૧,૦૪૬ છે. આમ ભારતમાં એલપીજીની કિંમત પડોશી દેશો કરતાં નીચી છે, જે ભારતીયો માટે રાહતની બાબત છે.
દરમિયાન ભારતે રાંધણ ગેસના સિલિન્ડરના ભાવમાં રૂ. ૬૦ અને ૧૯ કિલોના કમર્શિયલ એલપીજી સિલિન્ડરના ભાવમાં રૂ. ૧૧૪.૫નો વધારો કર્યો છે, જેથી દિલ્હીમાં ઘરેલુ રાંધણ ગેસનો ૧૪.૨ કિલોના સિલિન્ડરની કિંમત રૂ. ૮૫૩થી વધીને રૂ. ૯૧૩ થઈ ગઈ છે. આ સાથે ભારતે ૧૧ મહિનામાં બીજી વખત એલપીજીના ભાવમાં વધારો કર્યો છે. આ પહેલાં સરકારે ગયા વર્ષે એપ્રિલમાં રાંધણ ગેસના ભાવમાં રૂ. ૫૦નો વધારો કર્યો હતો. બીજીબાજુ ૧૯ કિલોના કમર્શિયલ એલપીજી સિલિન્ડરની કિંમત વધીને રૂ. ૧૮૮૩ થઈ ગઈ છે. ૧૧૪.૫ રૂપિયાનો વધારો ૧ માર્ચથી અમલમાં આવેલા રૂ. ૨૮ના વધારા ઉપરાંત છે. આ વર્ષે કમર્શિયલ એલપીજીના ભાવમાં રૂ. ૩૦૨નો વધારો થયો છે.
