આ પણ વાંચો ટ્રેન્ડિંગ સમાચાર
અંબાજી ભાદરવી પૂનમ મહામેળો ૨૦૨૬
અંબાજી, સંજીવ રાજપૂત, એબીએનએસ: શક્તિપીઠ અંબાજી ખાતે ચાલી રહેલા ભાદરવી પૂનમ મહામેળા દરમિયાન લાખો માઈભક્તો મા અંબાના દર્શનાર્થે ઉમટી રહ્યા છે. આ વિશાળ ધાર્મિક મેળામાં માઈભક્તોને સુરક્ષિત અને સુવિધાયુક્ત વાતાવરણ મળી રહે તે માટે જિલ્લા પોલીસ વિભાગ દ્વારા ચુસ્ત સુરક્ષા વ્યવસ્થા ગોઠવવામાં આવી છે. ટેક્નોલોજીના ઉપયોગ સાથે પોલીસકર્મીઓ રાઉન્ડ-ધ-ક્લોક ફરજ બજાવી રહ્યા છે અને મેળાની વ્યવસ્થાને સુચારુ રાખવામાં મહત્વપૂર્ણ ભૂમિકા ભજવી રહ્યા છે.
પોલીસ વિભાગ દ્વારા સુરક્ષાની કામગીરીની સાથે સેવાનો પણ સુંદર સમન્વય કરવામાં આવ્યો છે. અંબાજી મંદિર પરિસરમાં પોલીસકર્મીઓ દ્વારા સ્વચ્છતા જાળવવામાં સહયોગ આપવામાં આવી રહ્યો છે. ખાસ કરીને વૃદ્ધ, દિવ્યાંગ અને જરૂરિયાતમંદ માઈભક્તોને વ્હીલચેરની મદદથી મંદિર સુધી પહોંચાડી માતાજીના દર્શન કરાવવામાં પોલીસકર્મીઓ સેવાભાવથી કામગીરી કરી રહ્યા છે. ફરજ દરમિયાન ભક્તોની મુશ્કેલીને સમજીને તેમને જરૂરી માર્ગદર્શન અને સહાય પૂરી પાડવામાં આવી રહી છે.
મેળા દરમિયાન મોટી સંખ્યામાં શ્રદ્ધાળુઓ અંબાજી પહોંચતા હોવાથી પોલીસ વિભાગ દ્વારા વિવિધ સ્થળોએ સતત પેટ્રોલિંગ, માર્ગદર્શન અને વ્યવસ્થા જાળવવાની કામગીરી કરવામાં આવી રહી છે. પોલીસકર્મીઓ દિવસ-રાત ખડેપગે રહીને માઈભક્તોની સુરક્ષા સુનિશ્ચિત કરવાની સાથે ભીડ વ્યવસ્થાપન અને ટ્રાફિક વ્યવસ્થામાં પણ મહત્વપૂર્ણ કામગીરી કરી રહ્યા છે.
પોલીસકર્મીઓની આ સેવાભાવી કામગીરીમાં ફરજ પ્રત્યેની નિષ્ઠા સાથે ભક્તિભાવ પણ જોવા મળી રહ્યો છે. “જય અંબે”ના જયકારા સાથે માઈભક્તોમાં ઉત્સાહ વધારતા પોલીસકર્મીઓ સુરક્ષા કર્મચારી ઉપરાંત સેવક તરીકેની ભૂમિકા પણ નિભાવી રહ્યા છે. અંબાજી મહામેળામાં સુરક્ષા અને સેવા બંને ક્ષેત્રે પોલીસ વિભાગની આ કામગીરી માઈભક્તો માટે સહાયક અને વિશ્વાસદાયક બની રહી છે.
ભાદરવી પૂનમ મહામેળા દરમિયાન વહીવટી તંત્રના વિવિધ વિભાગો સાથે સંકલન સાધીને પોલીસ વિભાગ દ્વારા સતત કામગીરી કરવામાં આવી રહી છે. ટેક્નોલોજી આધારિત વ્યવસ્થા, ચુસ્ત સુરક્ષા અને સેવાભાવના સમન્વયથી માઈભક્તોને સલામત અને સુખદ દર્શનનો અનુભવ મળી રહે તે માટે પોલીસ વિભાગ પ્રતિબદ્ધતાપૂર્વક ફરજ બજાવી રહ્યો છે.
