આ પણ વાંચો ટ્રેન્ડિંગ સમાચાર
વડોદરા,ધો.૧૦ ની પરીક્ષા પૂરી થયા પછી બાઇક લઇને ત્રણ સવારી નીકળેલા ત્રણ મિત્રો આગળ જતી કારમાં પાછળથી ધડાકાભેર અથડાતા બાઇક ચલાવતા પોલીસ જવાનના પુત્રને ગંભીર ઇજા થઇ હતી. તેને સારવાર માટે હોસ્પિટલમાં લઇ જવાયો હતો. પરંતુ, તેનું મોત થયું હતું. માંજલપુર પોલીસે આ અંગે ગુનો દાખલ કરી કાર્યવાહી હાથ ધરી છે.
આજે બપોરે સાડા ત્રણ વાગ્યે માંજલપુર ખાતે આવેલ બરોડા સિટિ મોલ તથા લીલેરિયા પેરામાઉન્ટ વચ્ચેના રોડ પર પૂરઝડપે બાઇક પર આવતા ત્રણ સગીર છોકરાઓ કારની પાછળ ધડાકાભેર અથડાયા હતા. અકસ્માતમાં કારનો પાછળનો કાચ તૂટી ગયો હતો. તેમજ બાઇકચાલકને ગંભીર ઇજા થઇ હતી. જ્યારે તેની બાઇક પાછળ બેઠેલા તેના બે મિત્રો સ્થળ પરથી ભાગી ગયા હતા. કારમાંથી નીચે ઉતરેલા યુવકે ઇજાગ્રસ્તની હાલત જોઇ એમ્બ્યુલન્સને કોલ કરીને બોલાવી હતી. તેમજ પોલીસને પણ કોલ કર્યો હતો. થોડીવારમાં એમ્બ્યુલન્સ આવી જતા ઇજાગ્રસ્ત સગીરને સારવાર માટે સયાજી હોસ્પિટલમાં લઇ જવામાં આવ્યો હતો. પરંતુ, તેનો જીવ બચી શક્યો નહતો.
પ્રાથમિક તપાસમાં એવી વિગતો પ્રકાશમાં આવી હતી કે, મૃતકના પિતા પોલીસ ખાતામાં નોકરી કરે છે. આજે ધો.૧૦ ની પરીક્ષા પૂરી થતા મૃતક તેના અન્ય બે મિત્રો સાથે ફરવા નીકળ્યો હતો. તે દરમિયાન અકસ્માત થતા તેનું મોત થયું છે. બનાવ અંગે કારચાલક રજનીકાંતા જસાણી (રહે. કબીર કોમ્પલેક્સ, માંજલપુર) એ બાઇકચાલક સામે ફરિયાદ આપતા માંજલપુર પોલીસે ગુનો દાખલ કરી કાયદેસરની કાર્યવાહી હાથ ધરી છે.
બાઇકચાલક વિદ્યાર્થીને ગળાના ભાગે ઇજા થતા લોહીલુહાણ થઇને ઢળી પડયો
વડોદરા,
અકસ્માતની ફરિયાદ નોંધાવનાર રજનીકાંત જસાણી મંજુસર જી.આઇ.ડી.સી.ની કંપનીમાં મેનેજર છે. તેઓ પત્ની સાથે કાર લઇને મોલમાં કપડા રિટર્ન કરવા ગયા હતા. ત્યાંથી તેઓ પરત જતા હતા. તે સમયે જ બાઇક પર ત્રણ સવારી આવેલા છોકરાઓ તેમની કારમાં પાછળથી ધડાકાભેર અથડાતા ગંભરી રીતે ઘાયલ થયા હતા. બાઇકચાલકને ગળાના ભાગે ગંભીર ઇજા થતા લોહીલુહાણ થઇ ગયો હતો.
વડોદરામાં હાલતા ચાલતા એક્સિડન્ટ થઇ રહ્યા છે : સામાજિક કાર્યકર
વડોદરા,
આ અકસ્માતને નજરે જોનાર મહિલા સામાજિક કાર્યકરે જણાવ્યું હતું કે, હું નજીક જ ઊભી હતી. આ છોકરાઓ ત્રિપલ સવારી એટલી સ્પીડમાં આવ્યા હતા કે જોરદાર ધડાકા સાથે અથડાયા હતા. હેલમેટના કાયદાનો ભંગ, ઓવર સ્પીડમાં હતા. એટલે તે લોકોએ જ કાયદાનો ભંગ કર્યો છે. વડોદરામાં હાલતા અને ચાલતા એક્સિડન્ટ થઇ રહ્યા છે. પોલીસે આ અંગે કંઇ કરવું જોઇએ. અકસ્માતો અટકાવવા અસરકારક પગલા લેવા જોઇએ.
