આ પણ વાંચો ટ્રેન્ડિંગ સમાચાર
– સાડી અને ઈમીટેશનના ધંધામાં નફાની લાલચ આપી રોકાણ કરાવ્યું હતું
– શરૂઆતમાં થોડો નફો આપી વિશ્વાસ કેળવ્યા બાદ મોટી રકમનું રોકાણ કરાવી વિશ્વાસઘાત કર્યો
ભાવનગર : મહુવાના યુવક અને વૃદ્ધને સાડી અને ઈમીટેશનના ધંધામાં નફાની લાલચ આપી રોકાણ કરાવી શરૂઆતમાં થોડો નફો આપી વિશ્વાસ કેળવ્યા બાદ મોટી રકમનું રોકાણ કરાવી મહુવાના નાના પીપળવના વતની અને હાલ સુરત રહેતા શખ્સે કુલ રૂ.૪૯.૭૯ લાખની છેતરપિંડી આચરી વિશ્વાસઘાત કર્યો હતો. બનાવ અંગે મહુવા પોલીસ મથકમાં ફરિયાદ નોંધાઈ છે.
મહુવા તાલુકાના નાની જાગધાર ગામે રહેતા એસબીઆઈ મ્યુચ્યુઅલ ફંડની મહુવા બ્રાંચમાં આરએમ તરીકે નોકરી કરતા યુવક અર્જૂનદાસ જીણારામ ગોંડલીયાએ મહુવા પોલીસ મથકમાં ગોવિંદ રણછોડભાઈ ઢાપા (રહે.નાના પીપળવ) વિરૂદ્ધ ફરિયાદ નોંધાવી હતી. જેમાં વર્ષ-૨૦૨૨માં તેઓ એક્સિસ બેંકમાં નોકરી કરતા હતા ત્યારે તેમની સાથે નોકરી કરતા મહેશભાઈ ભીલે તેમના ગામના ઉક્ત ગોવિંદભાઈ સાથે ઓળખાણ કરાવી હતી અને ત્યારે ઉક્ત ગોવિંદભાઈએ પોતે સુરતમાં મોટા પાયે સાડી અને ઈમીટેશનનો ધંધો કરતા હોય અને આ ધંધામાં નફો સારો મળે છે તેમ જણાવી રોકાણ કરવાની વાત કરી હતી અને પ્રારંભમાં એપ્રીલ-૨૦૨૩માં તેમને રોકાણ માટે રૂ.૧.૫૦ લાખ આપ્યા હતા અને ૧૫-૨૦ દિવસમાં તેમણે તેમને નફાના રૂ.પાંચ હજાર રોકડા આપ્યા હતા અને પછી તેમને વિશ્વાસ બેસતા અલગ અલગ સમયે કુલ રૂ.૧૭,૭૯,૯૯૮નું રોકાણ કરાવી તેમાંથી રૂ.૩ લાખ પરત આપ્યા હતા અને બાકીના રૂ.૧૪,૭૯,૯૯૮ અવારનવાર ઉઘરાણી કરવા છતા બહાના બતાવી ઈરાદાપૂર્વક પૈસા નહી ચુકવી વિશ્વાસઘાત કર્યો હતો. તેમજ તેણે આવી રીતે મહુવામાં રહેતા લાલજીભાઈ ભગવાનભાઈ જિંજાળાનો વિશ્વાસ કેળવી અલગ-અલગ સમયે કુલ રૂ.૩૫ લાખનું રોકાણ કરાવી પૈસા પરત નહી આપી છેતરપિંડી આચરી વિશ્વાસઘાત કર્યો હતો. આ અંગે મહુવા પોલીસે ગુનો નોંધી આગળની તપાસ હાથ ધરી છે.
યુવકે લોન લઈને તો વૃદ્ધે જમીનના અને બચના રૂપિયા ધંધામાં રોક્યા હતા
ફરિયાદી અર્જૂનદાસને જુન-૨૦૨૩માં એક્સિસ બેંકમાં રૂ.પાંચ લાખની એપ્રુવ લોન મળતી હતી. જેથી ગોવિંદ ઢાપાએ પોતે હપ્તો ભરી દેશે અને નફામાં બને એટલા વધારે પૈસા આપીશ તેવું વચન આપી લોન લેવડાવી રૂ.પાંચ લાખનું રોકાણ કરાવ્યું હતું. જ્યારે લાલજીભાઈ પાસે આવેલા પોતાની જમીન વેચાણના અને બચત મૂડીના મળી કુલ રૂ.૩૫ લાખનું રોકાણ શખ્સે કરાવ્યું હતું.
