આ પણ વાંચો ટ્રેન્ડિંગ સમાચાર
કૌટુંબિક સાળી એવી પ્રેમિકાના 9 પરિવારજનોએ હુમલો કર્યો : પ્રેમિકાને લેવા યુવાન તેની માતા સાથે જતો હતો ત્યારે નીંગાળા- રાજુલા વચ્ચે હાઈ- વે પર 3 મહિલા સહિતના લોકો ખુન્નસથી તૂટી પડયાં
અમરેલી, : અમરેલી જિલ્લામાં પ્રેમ પ્રકરણમાં એક યુવકનું અપહરણ કરી મારપીટ કરાયાનો તથા તેની માતા પર કાર ચઢાવી દઈ હત્યા નીપજાવાયાનો બનાવ બનતાં ચકચાર વ્યાપી ગઈ છે. પોતાની કૌટુંબિક સાળી સાથે મૈત્રી કરાર કરનાર નીંગાળા-1ગામનો ભાવેશ ભગવાનભાઈ ભીલ (ઉ.વ.૨૫) તેને લેવા પોતાની માતા સાથે રાજુલા જઈ રહ્યો હતો ત્યારે એ યુવતીના પરિવારજનોએ અધરસ્તેથી તેને ઉઠાવી જઈ ગોંધી રાખીને ઢોર માર માર્યો હતો, તેમજ એ પહેલાં તેની માતાને મોતને ઘાટ ઉતારી દીધા હતા એમ વર્ણવીને તેણે પીપાવાવ પોલીસ મથકમાં નવ વ્યક્તિ વિરૂધ્ધ હત્યા, અપહરણ સહિતની કલમ હેઠળ ફરિયાદ નોંધાવી છે.
આ મામલે નીંગાળા-1 નવી શાળા પાસે રહેતા અને ખેતીકામ કરતા ભાવેશ ભગવાનભાઈ ભીલ (ઉ.વ. 25)એ ફરિયાદમાં જણાવ્યું છે કે 3 વર્ષ પહેલા પત્ની ભારતીની માસીની પુત્રી કૈલાસ બટુક મકવાણા (રહે. મહુવા)ના પરિવાર સાથે તેણે આસરાણા ગામે ભાગીયુ રાખ્યું હતું. ત્યારથી તેને કૈલાસ સાથે પ્રેમસંબંધ બંધાયો હતો. યુવતીના પરિવારને પ્રેમ સંબંધની ખબર પડતાં તે નીંગાળા-1 ગામે આવી ગયો હતો. એક મહિના પહેલા બંને ભાગીને પોરબંદર ગયા બાદ જૂનાગઢ જતા રહ્યા હતા. ત્યાં તેણે કૈલાસ સાથે મૈત્રીકરાર કર્યા હતા. કૈલાસના પરિવારજનોએ સાવરકુંડલા પોલીસ સ્ટેશનમાં ફરિયાદ કરતાં પાંચેક દિવસ પહેલા બંને પોલીસ સ્ટેશનમાં હાજર થઇ ગયા હતા અને કૈલાસને તેના પરિવારજનો સમજાવી પોતાની સાથે લઇ ગયા હતા.
ગઈકાલ બપોરે તેનાં મોબાઇલમાં ફોન કરી કૈલાસે કહ્યું કે, ‘મને મારા ઘરવાળા હેરાન કરે છે, ત્રાસ આપે છે એટલું હું મહુવાથી રાજુલા આવવા નીકળી ગઇ છું, તુ મને રાજુલા બસ સ્ટેશને લેવા આવ. ત્યાંથી આપણે પીપાવાવ પોલીસ સ્ટેશનમાં હાજર થવા દઇશું.’ તેણે તેની માતા જીતુબેનને વાત કર્યા બાદ બંને ઘરેથી આગરવાળા રસ્તેથી રાજુલા જવા માટે નીકળ્યા હતા. નેશનલ હાઇવે-૧ ઉપર આવેલા એક પેટ્રોલ પંપ પાસે પહોંચ્યા ત્યારે એક કારમાં ધસી આવેલાં તમામ આરોપીઓ નીચે ઉતરી તેને તથા તેની માતા જીતુબેનને માર મારવા લાગ્યા હતા અને તેને બળજબરીથી કારમાં બેસાડી દીધો હતો. મહેશ, રોહિત અને યોગેશે માતાને ધક્કો મારી પછાડી દીધા બાદ કાર તેની ઉપર ચડાવી દઇ મોત નિપજાવી ગાડી ચલાવી આગળ નીકળી ગયા અને તેને રસ્તામાં ‘જો કોઇને અવાજ કર્યો છે તો તારી માંની જેમ તને પણ પતાવી દેશું’ કહી ધમકી આપી હતી અને થોડે આગળ આરોપીઓએ ગાડી મહુવા તરફ લઇ ખરેડ ગામે ખારામાં બંને બાજુ તળાવ વચ્ચે પાળા ઉપર ગાડી ઉભી રાખી તેને ઉતારી મુક્યો હતો.
ઉતારી મુક્યા પછી ફરી ઉઠાવી જઈ મારકૂટ, પોલીસે છોડાવ્યો
થોડીવાર બાદ બે બાઇક પર આરોપી હિતેશ, બટુક, કમલેશ, રોહિત અને મહેશે આવી તેને પકડી પટ્ટા તથા લોખંડના સળિયાથી આડેધડ માર માર્યો હતો અને ‘જો કૈલાસ નહીં મળે તો તને મારીને આ તળાવમાં ફેંકી દેશું અને પોલીસને પણ ખબર નહીં પડે’ તેવી ધમકી આપી આરોપીઓએ તેનું કારમાં અપહરણ કરી મહુવા ભવાનીનગરમાં આરોપી હિતેશના ઘરે લઇ જઇ ગોંધી રાખી ફરી મારકૂટ કરી હતી. જાણ થતા પોલીસ આવી જતાં તેને મુક્ત કરાવ્યા બાદ સારવાર માટે હોસ્પિટલે ખસેડયો હતો.
