આ પણ વાંચો ટ્રેન્ડિંગ સમાચાર
માર્ગ અકસ્માતો, ડૂબી જવા અને હાર્ટ એટેકનો સિલસિલો
વાવડી ચોકડી પાસે નશામાં ધૂત કારચાલકે રિક્ષાને ઠોકર મારતાં પતિની નજર સામે પત્નીનું મોત, સ્વજનો ગુમાવનાર પરિવારોમાં શોકનું મોજું
મોરબી: મોરબી જિલ્લામાં વિતેલા ૨૪ કલાકમાં અપમૃત્યુ અને જીવલેણ અકસ્માતોના પાંચ જુદા-જુદા બનાવો સામે આવ્યા છે, જેમાં કુલ પાંચ લોકોએ પોતાનો જીવ ગુમાવ્યો છે. ખાસ તો વાવડી ચોકડી પાસે દારૂના નશામાં ધૂત કારચાલકે રિક્ષાને ઠોકર મારતા પતિની નજર સામે પત્નીનું મોત નીપજ્યું હતું. આ બનાવોને પગલે સ્વજનો ગુમાવનાર પરિવારોમાં શોકનું મોજું ફરી વળવા સાથે સમગ્ર જિલ્લામાં ભારે અરેરાટી વ્યાપી ગઈ છે.
પ્રથમ બનાવમાં મોરબીની વાવડી ચોકડી નજીક મોડી રાત્રે રામપાર્ક સોસાયટીમાં રહેતા દિલીપભાઈ સોઢા અને તેમના પત્ની ભાનુબેન સીએનજી રિક્ષા લઈને ઘરે જઈ રહ્યા હતા, ત્યારે એક બેફામ કારે રિક્ષાને હડફેટે લીધી હતી. સ્થાનિકોના જણાવ્યા અનુસાર કારચાલક નશામાં ધૂત હતો અને ગાડીમાંથી દારૂની બોટલો પણ મળી આવી છે. આ અકસ્માતમાં ભાનુબેનનું ઘટનાસ્થળે જ મોત નીપજ્યું હતું, જ્યારે દિલીપભાઈ ગંભીર રીતે ઈજાગ્રસ્ત થતા તેમને ખાનગી હોસ્પિટલમાં ખસેડાયા હતા. બીજા અકસ્માતમાં ટંકારાના ઘુનડાથી રસનાળ જવાના રસ્તે વળાંક પાસે પુરઝડપે આવતી કારના ચાલકે મોટરસાયકલને જોરદાર ટક્કર મારી હતી. જેમાં બાઇક સવાર ઉમેશભાઈ ભગવાનજી વડગામાનું મોત થયું હતું. અકસ્માત સર્જીને કારચાલક નાસી છૂટયો હતો.
બીજી તરફ હળવદ તાલુકાના બુટવડા ગામે રહેતા ૨૦ વર્ષીય અલકાબેન મુકેશભાઈ લોદરિયાએ અગમ્ય કારણોસર ગળેફાંસો ખાઈ જીવન ટૂંકાવી લીધું હતું. મૃતક અલકાબેનના લગ્નને હજી માંડ એક વર્ષ થયું હતું અને તેમને ૨ મહિનાનું નાનું સંતાન છે. આ કરુણ ઘટનાથી પરિવાર શોકમાં ડૂબી ગયો છે. અન્ય ઘટનામાં મોરબીના રવાપર ઘુનડા રોડ પર રહેતા પ્રાણજીવન રાઘવજીભાઈ બરાસરાને અચાનક છાતીમાં તીવ્ર દુખાવો ઉપડવા સાથે હાર્ટએટેકથી મોત નીપજ્યું હતું. જ્યારે મોરબીના ભડીયાદ રોડ પર આવેલી જવાહર સોસાયટીનો ૧૮ વર્ષનો યુવક કેતન રઘુભાઈ જોગડીયા મચ્છુ ડેમમાં ન્હાવા જતાં ડૂબી જવાથી મોત નીપજ્યું હતું.
