આ પણ વાંચો ટ્રેન્ડિંગ સમાચાર
મવડી રોડ-કણકોટ રોડ વચ્ચે પાળ વિસ્તારમાં કેન્દ્રબિંદુ
શહેરમાં નવી ફોલ્ટલાઈન સક્રિય થયાનું અનુમાનઃ ભચાઉ પંથકમાં પણ ૩ ભૂકંપો
રાજકોટ: રાજકોટમાં મવડી,કણકોટ,પાળ વિસ્તારમાં ધરતીની નીચે વધુ એક ફોલ્ટલાઈન સક્રિય થયાનું અનુમાન થઈ રહ્યું છે. રાજકોટ મનપા વિસ્તારમાં બે માસ પૂર્વે ૩.૨નો ધરતીકંપ આવ્યા બાદ આજે ફરી એ જ કેન્દ્રબિંદુની ૨ કિ.મી.નજીક ૩.૦નો ભૂકંપ મધ્યરાત્રિના ૧.૨૦ વાગ્યે આવ્યાનું આઈ.એસ.આર.માં નોંધાયું છે.
મવડી રોડ અને કણકોટ-જસવંતપુર રોડ, જસવંતપુર નજીક તેમજ કણકોટ અને પાળ ગામ પાસે ગોલ્ડન વિલા પાર્ટીલોન્સ નજીક ૨૨.૨૨૬ અક્ષાંસ અને ૭૦.૭૫૧ રેખાંશ ઉપર આ ભૂકંપ ઉદભવ્યો હતો. જો કે તેનાથી નોંધપાત્ર નુક્શાનના કોઈ અહેવાલો નથી.
હાઈરાઈઝ બિલ્ડીંગો જ્યાં વધી રહ્યા છે તે વીસ લાખની વસ્તી ધરાવતા રાજકોટમાં અગાઉ કુવાડવા રોડ પર તેમજ ગોંડલ તરફ ધોરાજી,ઉપલેટા પંથકમાં તીવ્ર ભૂકંપો આવ્યા છે પરંતુ, બે માસથી શહેરમાં મવડી તરફ ભૂકંપીય ગતિવિધિ જોવા મળી છે. બે માસ પૂર્વે તા.૨૪-૩-૨૦૨૬ના ઉપરોક્ત વિસ્તારની બે કિ.મી.નજીક ૧૫ કિ.મી. ઉંડાઈએ ૩.૨નો ધરતીકંપ ઉદ્ભવ્યો હતો. આજે પણ જમીનમાં ૧૫ કિ.મી. ઉંડાઈએ ૩.૦નો ધરતીકંપ ઉદ્ભવ્યો છે.ભૂકંપ ભય પમાડવા નહીં પણ મજબૂત બાંધકામ કરવા સૂચવે છે.
બીજી તરફ, ચાલુ મે માસમાં કચ્છના ભચાઉ પંથકમાં ૩.૦, ૩.૧ અને ૨.૯ની તીવ્રતાના એમ ત્રણ ધરતીકંપો નોંધાયા છે. ગત માર્ચમાં સૌરાષ્ટ્રમાં તાલાલા સહિત વિસ્તારોમાં ભૂકંપીય ગતિવિધિ વધ્યા બાદ એક માસથી કચ્છમાં સિસ્મીક એક્ટીવિટીઝમાં વધારો જોવા મળ્યો છે.
