વડોદરાઃ હાલમાં ચાલી રહેલી ધો.૧૦ અને ધો.૧૨ની બોર્ડ પરીક્ષામાં ધો.૧૦ના વિદ્યાર્થીઓએ સાયન્સ વિષયની પરીક્ષા આપી હતી.ગુજરાતની જેમ આ પેપર પણ એકંદરે સરળ હોવાથી વિદ્યાર્થીઓ ખુશખુશાલ ચહેરે પરીક્ષા આપીને બહાર નીકળતા જોવા મળ્યા હતા.
વિષય શિક્ષક જપન જોષીએ કહ્યું હતું કે, તેજસ્વી અને નિયમિત મહેનત કરનાર વિદ્યાર્થીઓ આજના પેપરમાં પૂરેપૂરા એટલે કે ૮૦માંથી ૮૦ માર્કસ મેળવી શકે તેવું પેપર હતું.પેપર બોર્ડની બ્લુપ્રિન્ટને ધ્યાનમાં રાખીને કાઢવામાં આવ્યું હતું.સેક્શન-એના તમામ સવાલો ખૂબ જ સહેલા અને પાઠય પુસ્તક આધારિત હોવાથી વિદ્યાર્થીઓ તેમાં પૂરા માર્કસ મેળવી શકશે.બાકીના વિભાગોના સવાલો પણ સરળ હતા.
જ્યારે ધો.૧૨ સામાન્ય પ્રવાહના વિદ્યાર્થીઓએ બિઝનેસ ઓર્ગેનાઈઝેશન એટલે કે વાણિજ્ય વ્યવસ્થાના પેપરની પરીક્ષા આપી હતી.આ પેપર પણ સરળ હતું.વિભાગ એના તમામ સવાલો પાઠય પુસ્તકમાંથી પૂછાયા હતા.વિભાગ સીમાં આકૃતિવાળો સવાલ પૂછવામાં આવ્યો હોવાથી દ્રષ્ટિહિન વિદ્યાર્થીઓ માટે અલગથી પ્રશ્ન પૂછવામાં આવ્યો હતો.સેક્શન ઈમાં તાલીમ અને વિકાસના તફાવતમાં કેટલા મુદ્દા લખવા તેની સ્પષ્ટતા નહીં હોવાથી વિદ્યાર્થીઓ મૂંઝવણમાં મૂકાયા હતા.આમ છતા પેપર એકંદરે સરળ હતું તેમ વિષય શિક્ષક જિગર પટેલનુંં કહેવું હતું.
રોડ અકસ્માતમાં હાથનું હાડકું ખસી જતા
વિદ્યાર્થિનીએ પરીક્ષા કેન્દ્ર પર જતા પહેલા રાઈટર માટે દોડવું પડયું
હાલમાં ચાલી રહેલી ધો.૧૦ અને ધો.૧૨ની બોર્ડ પરીક્ષાઓમાં વધુ એક કિસ્સામાં બોર્ડની પરીક્ષા આપતી વિદ્યાર્થિનીને અકસ્માત નડતા તેને પરીક્ષા કેન્દ્ર પર જતા પહેલા રાઈટર મેળવવા માટે ડીઈઓ કચેરી જવાનો વારો આવ્યો હતો.
મળતી વિગતો પ્રમાણે વડોદરા નજીક નિમેટા પાસે રહેતી નિમિષા મહિડા ધો.૧૦ની પરીક્ષા આપી રહી છે.આજે તેનું બીજું પેપર હતું.તે પહેલા રવિવારે તે પિતા સાથે ટુ વ્હીલર પર જઈ રહી હતી ત્યારે સામેથી આવતા એક ટુ વ્હીલર સાથે અકસ્માત સર્જાયો હતો અને તે પડી ગઈ હતી.તેના માતા પિતા તેને સારવાર માટે તાત્કાલિક હોસ્પિટલ લઈ ગયા હતા.તેનું કોણી પાસેનું હાડકું ખસી ગયું હતું.જેના કારણે હાથ પર પાટો બાંધવો પડયો હતો.નિમિષાના માતા ઉર્વશીબેને કહ્યું હતું કે, આ સ્થિતિમાં તે જાતે લખી શકે તેમ નહોતી અને આજે તેનું બીજું પેપર હતું.જેના કારણે અમે સવારે ડીઈઓ કચેરી ખાતે રાઈટરની મંજૂરી લેવા માટે દોડયા હતા.ગણતરીના સમયમાં રાઈટર માટે મંજૂરી મળી ગઈ હતી અને તેના કારણે આજે મારી દીકરીએ રાઈટરની મદદથી પરીક્ષા આપી હતી.બાકીના પેપર પણ તેણે રાઈટરની મદદથી લખવા પડશે.
કેમેસ્ટ્રીના પેપરમાં એમસીક્યૂ વિદ્યાર્થીઓની કસોટી કરે તેવા
ધો.૧૨ સાયન્સમાં વિદ્યાર્થીઓએ કેમેસ્ટ્રી વિષયની પરીક્ષા આપી હતી.જેમાં એમસીક્યૂ સેક્શનમાં પાંચેક એમસીક્યૂ ટ્વિસ્ટ કરીને પૂછાયા હતા અને આ પ્રશ્નોએ વિદ્યાર્થીઓની કસોટી કરી હશે.પાર્ટ બીમાં સબજેક્ટિવ સવાલો પૂછવામાં આવ્યા હતા તે પાઠયપુસ્તક આધારિત હતા.જે વિદ્યાર્થીઓએ પાઠયપુસ્તકમાં સ્વાધ્યાયના પ્રશ્નો સારી રીતે તૈયાર કર્યા હશે તેમને પાર્ટ બી અઘરો નહીં લાગ્યો હોય તેમ વિષય શિક્ષક કમલનયન ભટ્ટનું કહેવું હતું.
