આ પણ વાંચો ટ્રેન્ડિંગ સમાચાર
મૂળ યુ.પી.ના અને હાલ જૂનાગઢમાં મજૂરી કરતા હતા : 7 યુવાનો ટહેલવા ગયા ત્યારે ગરમીમાં પાણી જોઈને ન્હાવા પડયા હતા : જેમાંથી 4 નીકળી શક્યા, 3 ઊંડાં પાણીમાં ગરક
જૂનાગઢ : મૂળ ઉત્તરપ્રદેશના અને હાલ જૂનાગઢમાં રહેતા યુવાન અને તરૂણ સહિત સાત મિત્રો આજે બપોરે વિલીંગડન ડેમ ખાતે ટહેલવા ગયા હતા, જ્યાં ગરમીમાં ડેમની કુંડીમાં પાણી જોઈ આ યુવાન અને તરૂણ ન્હાવા પડયા હતા. તેમાથી બે તરૂણ અને એક યુવાન ઉંડા પાણીમાં ગરક થઈ ગયા હતા જ્યારે ચાર યુવાન નીકળી ગયા હતા. ફાયરબ્રિગેડના સ્ટાફે પહોંચી શોધખોળ હાથ ધરી હતી પરંતુ ત્રણેયના મૃતદેહ જ મળી આવ્યા હતા. આ બનાવથી ગમગીની વ્યાપી ગઈ હતી.
આ અંગેની વધુ વિગત મુજબ મૂળ ઉત્તરપ્રદેશના બહરાઇચ જિલ્લાના નંદબારાના અને હાલ જૂનાગઢના નરસિંહ મહેતા ચોરા પાસે રહેતા અને મજુરી કામ કરતા શિવમ ભારતીદિન શાહુ (ઉ.વ.18), હુસેન જીલાની શેખ (ઉ.વ.16) અને કળામુદીન શેખ (ઉ.વ.16) અને અન્ય ચાર મિત્રો આજે બપોરે વિલીંગડન ડેમ બાજુ ટહેલવા માટે ગયા હતા. આ યુવાન અંર તરૂણ ગરમી હોવાથી ડેમ જ્યાંથી ઓવરફ્લો થાય છે એ કુંડીમાં રહેલા પાણીને જોઈ તેમાં ન્હાવા પડયા હતા. સાતેય મિત્રો ન્હાવા પડયા બાદ બે તરૂણ અને એક યુવાન ડૂબવા લાગ્યા હતા, જ્યારે ચાર યુવાન બહાર નીકળી ગયા હતા. બહાર નીકળી ગયેલા યુવાનોએ જાણ કરતા સ્થાનિક લોકો તેમજ ફાયરબ્રિગેડ અને પોલીસ સ્ટાફ ઘટનાસ્થળે પહોંચી ગયો હતો.
