આ પણ વાંચો ટ્રેન્ડિંગ સમાચાર
વડોદરાઃ એક તરફ પોલીસ ભારદારી અને ખાનગી વાહનો તથા રીક્ષા ચાલકો સામે આંખ આડા કાન કરે છે તો બીજી તરફ શહેરના લોકો ટ્રાફિકના નિયમોનું પાલન કરવા માટેની જાગૃતિ અને ઈચ્છા શક્તિ બતાવી રહ્યા નથી.
વડોદરામાં લોકોની ટ્રાફિક સેન્સ પર ટ્રાફિક પોલીસના આંકડા સવાલો ઉઠાવી રહ્યા છે.એક વર્ષમાં ટ્રાફિકના નિયમો તોડવાના મામલામાં ભારે ઉછાળો આવ્યો છે.ટ્રાફિક પોલીસ દ્વારા નિયમોના ભંગ બદલ લોકોને અપાતા ચલણની સંખ્યા બે વર્ષમાં જ ત્રણ ગણી થઈ ગઈ છે.ટ્રાફિક પોલીસના આંકડા અનુસાર ૨૦૨૪માં ટ્રાફિકના વિવિધ નિયમોના ભંગ બદલ લોકોને ૧.૭૮ લાખ ચલણ આપવામાં આવ્યા હતા.જ્યારે ૨૦૨૫માં આ સંખ્યા વધીને ૬.૫૩ લાખ પર પહોંચી ચૂકી છે.
પોલીસનું કહેવું છે કે, ટ્રાફિકના નિયમોના પાલન માટે વિવિધ પ્રકારના કાર્યક્રમોનું આયોજન કરવામાં આવે છે પણ તેની લોકો પર મર્યાદિત અસર પડી છે.ખાસ કરીને પીક અવર્સમાં લોકો ટ્રાફિકના નિયમોનો સૌથી વધારે ભંગ કરે છે.જેમાં ઓવર સ્પિડિંગ, સિગ્નલ તોડવાનો અને રોંગ સાઈડ પર વાહન ચલાવવાનો સમાવેશ થાય છે.જે અકસ્માતો માટે પણ કારણભૂત બને છે.પોલીસના મતે ટુ વ્હીલર ચાલકો દ્વારા હેલમેટ નહીં પહેરવાના અને કાર ચાલકો દ્વારા સીટ બેલ્ટ નહીં પહેરવાના ચલણ સૌથી વધારે હોય છે.
કયા પ્રકારના ગુનામાં કેટલા ચલણ અપાયા
ગુનો ૨૦૨૪ ૨૦૨૫ કેટલો વધારો
ત્રણ સવારી ૨૪૫૨૪ ૧.૧૮ લાખ ૩૮૧ ટકા
હેલમેટ વગર ડ્રાઈવિંગ ૧૮૦૯૩ ૧.૮૧ લાખ ૯૦૫ ટકા
સીટ બેલ્ટ વગર ડ્રાઈવિંગ ૫૯૭૨૬ ૯૭૧૮૨ ૬૨ ટકા
ડ્રાઈવિંગ વખતે ફોન પર વાત ૧૩૫૯૮ ૨૪૬૨૦ ૮૧ ટકા
ડોક્યુમેન્ટનો અભાવ ૫૬૮૦ ૨૪૬૨૨ ૩૩૩ ટકા
જોખમી ડ્રાઈવિંગ ૧૬૨૫૩ ૫૦૬૯૫ ૨૧૧ ટકા
સિગ્નલ તોડવો ૩૪૫૬ ૧૩૨૬૬ ૨૮૩ ટકા
૧૫૦ લોકોના ડ્રાઈવિંગ લાઈસન્સ સસ્પેન્ડ કરવા ભલામણ
૨૦૨૫માં ટ્રાફિક પોલીસે ટ્રાફિકના નિયમોનો છાશવારે ભંગ કરનારા ૧૫૦ લોકોના ડ્રાઈવિંગ લાઈસન્સ સસ્પેન્ડ કરવાની ભલામણ આરટીઓને કરી હતી.આ પૈકી ૧૦૬ લોકો ગુજરાતના હતા અને બાકીના અન્ય રાજ્યોના હતા.
નિયમો અંગે તો જાગૃતિ છે પણ પોતાની સુરક્ષા માટે નથી
એમ.એસ.યુનિવર્સિટીની લો ફેકલ્ટીના અધ્યાપક અને ટ્રાફિક એક્સપર્ટ ઉમંગ મોદીનું કહેવું છે કે, સોશ્યલ મીડિયાના યુગમાં લોકોની ટ્રાફિક નિયમો અંગે જાગૃતિ તો વધી છે.લોકોને ટ્રાફિક નિયમોનો ભંગ કરવાથી ચલણ મળશે તે પણ ખબર પડે છે પણ લોકો પોતાની સુરક્ષા માટે જાગૃત નહીં હોવાથી ટ્રાફિકના નિયમોનું પાલન કરતા નથી.ઉપરાંત આપણી સિસ્ટમ પ્રો એક્ટિવ નથી પણ રિએકટિવ છે.જેના કારણે ટ્રાફિકને લગતા ગુના વધી રહ્યા છે.
નિયમોનો અસરકારક અમલ કરવાથી ચલણની સંખ્યા વધી
ટ્રાફિક પોલીસના કહેવા પ્રમાણે પોલીસ દ્વારા ટ્રાફિકના નિયમોનું કડકાઈપૂર્વક પાલન કરાવવામાં આવી રહ્યું છે.સીસીટીવી કેમેરાના નેટવર્કનો વ્યાપ વધ્યો હોવાથી હવે ટ્રાફિક નિયમો તોડનારા લોકો પર વધારે અસરકારક રીતે નજર રાખી શકાય છે.જેના કારણે ચલની સંખ્યા વધી છે.
