આ પણ વાંચો ટ્રેન્ડિંગ સમાચાર
વડોદરા, તા.17 વડોદરા શહેર અને જિલ્લામાં ઘરગથ્થુ એલપીજી ગેસ બોટલના કાળાબજાર તેમજ દુરુપયોગ અંગે જિલ્લાના વહીવટીતંત્ર દ્વારા વ્યાપક તપાસણી હાથ ધરવામાં આવી છે. શહેરની હરિ ગેસ એજન્સીમાં અનેક ગેરરીતિઓ જણાઇ હતી જ્યારે જિલ્લામાં ડભોઇમાં ભજિયાવાલા દ્વારા ઘરગથ્થુ એલપીજી બોટલનો દુરુપયોગ મળતા કાર્યવાહી હાથ ધરવામાં આવી છે.
પ્રાપ્ત માહિતી મુજબ આજે બપોર બાદ શહેરના સમા વિસ્તારમાં આવેલી ‘હરિ ગેસ એજન્સી ખાતે જિલ્લા પુરવઠાખાતાની ટીમ દ્વારા આકસ્મિક તપાસ હાથ ધરવામાં આવી હતી. આ તપાસ દરમિયાન પ્રાથમિક તબક્કે ગેરરીતિઓ સામે આવી હતી. ગેસ એજન્સીના સંચાલકો દ્વારા સરકાર દ્વારા નિયત કરવામાં આવેલી વિતરણ વ્યવસ્થાનું ઉલ્લંઘન કરવામાં આવતું હતું.
એજન્સી દ્વારા ગ્રાહકોને ઘરે બેઠા ગેસ સિલિન્ડર પહોંચાડવાને બદલે સીધું જ ગોડાઉન પરથી વિતરણ કરવામાં આવતું હતું અને ડિલિવરી ચાર્જ પણ વસૂલવામાં આવતો હતો. આમ, સરકારી નિયમોનું ઉલ્લંઘન અને ગ્રાહકો પાસેથી ગેરકાયદે વધારે નાણાંની વસૂલાત બદલ આ ગેસ એજન્સીને નોટિસ ફટકારી કાયદેસરની કાર્યવાહી શરૃ કરવામાં આવી છે.
આ ઉપરાંત ડભોઈ મામલતદાર કચેરીની ટીમ દ્વારા ડભોઈના જકાતનાકા પાસે આવેલી લાલાભાઈ ભજીયાવાળા નામની દુકાન પર તપાસ હાથ ધરવામાં આવી હતી. તપાસ દરમિયાન દુકાનદાર રાજકુમાર કનોજીયા દ્વારા ઘરેલું રાંધણ ગેસના સિલિન્ડરનો ઉપયોગ વેપારી હેતુ માટે કરવામાં આવતો હોવાનું જણાયુ હતું. ધંધાના સ્થળ પરથી ઘર વપરાશ માટેના એચ.પી. અને ઈન્ડેન કંપનીના કુલ ૪ ગેસ સિલિન્ડર મળ્યા હતા. જેમાં એક સિલિન્ડર ભરેલો એટલે કે વપરાશમાં હતો. જ્યારે ત્રણ સિલિન્ડર ખાલી હતા. આ તમામ સિલિન્ડરોને સીઝ કરી સરકારી કબજે લેવાયા હતાં. સીઝ કરાયેલ જથ્થો મંડાળાની નિરવ ભીખાભાઇ પટેલ સંચાલિત અક્ષરધામ ઇન્ડેન ગ્રામીણ વિતરણને સોંપવામાં આવ્યો છે.
