આ પણ વાંચો ટ્રેન્ડિંગ સમાચાર
પાટણ, અનિલ રામાનુજ એબીએનએસ, પાટણ જિલ્લાના સમી તાલુકાના દાઉદપુર ગામની દીકરીએ ધોરણ-12 CBSE બોર્ડની પરીક્ષામાં જિલ્લામાં પ્રથમ ક્રમ મેળવી સમગ્ર વઢીયાર પંથકનું નામ રોશન કર્યું છે. દાઉદપુર ગામના વતની અને હાલ પાટણ ખાતે નિવાસ કરતા સચિનકુમાર રસિકલાલ વોરાની દીકરી ક્રીશી સચિનકુમાર વોરાએ 97.80 ટકા સાથે જિલ્લાભરમાં પ્રથમ સ્થાન પ્રાપ્ત કરી પરિવાર, સમાજ તેમજ શિક્ષણ જગતમાં ગૌરવની લાગણી પ્રસરી દીધી છે.
ક્રીશી વોરા પાટણ સ્થિત ક્રિષ્ના સ્કૂલમાં અભ્યાસ કરતી હતી. બાળપણથી જ અભ્યાસ પ્રત્યે લગાવ અને સતત મહેનતના કારણે તેણીએ દરેક ધોરણમાં ઉત્તમ પરિણામો મેળવ્યા હતા. ધોરણ-12ની મહત્વપૂર્ણ પરીક્ષામાં પણ ક્રીશીએ પોતાની પ્રતિભા સાબિત કરી જિલ્લામાં ટોચનું સ્થાન મેળવ્યું છે.
ક્રીશીના દાદા રસિકલાલ વોરા વઢીયાર પંથકમાં આગવી ઓળખ ધરાવે છે. પરિવાર દ્વારા દીકરીના શિક્ષણને પ્રાથમિકતા આપવામાં આવતા સચિનકુમાર વોરા પરિવાર સાથે પાટણ સ્થાયી થયા હતા, જેથી દીકરીને ગુણવત્તાસભર શિક્ષણ મળી રહે. માતા-પિતાના માર્ગદર્શન, શિક્ષકોના સહકાર અને પોતાની અવિરત મહેનતના બળે ક્રીશીએ આ સિદ્ધિ હાંસિલ કરી છે.
ક્રીશીની આ ભવ્ય સફળતા બાદ દાઉદપુર ગામ, વઢીયાર પંથક તેમજ સમસ્ત વોરા સમાજમાં ખુશીની લાગણી છવાઈ ગઈ છે. પરિવારજનો, સગા-સંબંધીઓ, શિક્ષકો અને સમાજના આગેવાનો દ્વારા ક્રીશીને શુભેચ્છાઓ પાઠવાઈ રહી છે. શિક્ષણ ક્ષેત્રે વધુ પ્રગતિ કરી ભવિષ્યમાં ઊંચું સ્થાન હાંસિલ કરે તેવી સૌએ શુભકામનાઓ વ્યક્ત કરી છે.
