આ પણ વાંચો ટ્રેન્ડિંગ સમાચાર
– ફાયરિંગની ઘટનાની તપાસ ઈન્ડિયા હાઉસ સુધી પહોંચી
– પોલીસ, વન વિભાગનું સંયુક્ત ઓપરેશન કલાકો સુધી ચાલ્યું, 50 જીવતા કાર્ટિસ, 6 છરી જપ્ત
ભાવનગર : શહેરના નવાપરા વિસ્તારમાં ફાયરિંગની ઘટનામાં સંડોવાયેલા બે આરોપીને ઝડપવા એસપી સહિતના પોલીસ કાફલાએ સાંઢિયાવાડ વિસ્તારમાં આવેલા ઈન્ડિયા હાઉસમાં મેગા ઓપરેશન હાથ ધર્યું હતું. કલાકો સુધી ચાલેલા ઓપરેશનમાં પોલીસને ૫૦ જીવતા કાર્ટિસ સહિત અનેક પ્રતિબંધિત વસ્તુઓ મળી આવી હતી. જે મામલે ગંગાજળિયા પોલીસ મથક અને વનવિભાગ દ્વારા અલગથી ગુનો દાખલ કરવા તજવીજ હાથ ધરવામાં આવી છે.
શહેરના નવાપરા વિસ્તારમાં થયેલી ફાયરિંગની ઘટનામાં સંડોવાયેલા બે શખ્સો તૌફિક અને વલી હાલારીને ઝડપવા માટે ભાવનગર એસપી સહિતનો પોલીસ કાફલાએ સાંઢિયાવાડ વિસ્તારમાં આવેલા ઈન્ડિયા હાઉસમાં મેગા સર્ચ ઓપરેશન હાથ ધરવામાં આવ્યું હતું. જેમાં પોલીસને ૫૦ જીવતા કાર્ટિસ, ૬ છરી, ૪ કાળિયારના શિંગડા, ૧ પોકેટ મંકી અને વિદેશી દારૂની એક બોટલ મળી આવી હતી. જે બાદ પોલીસે આ મામલે વનવિભાગને જાણ કરતા વન વિભાગની ટીમ પણ તપાસમાં જોડાઈ હતી અને પ્રતિબંધિત વસ્તુઓને કબ્જે કરી ઉબેદ શેખ અને તેના ભાઈની ધરપકડ કરી પોલીસે ગંગાજળિયા પોલીસ મથકમાં જ્યારે વનવિભાગ દ્વારા અલગથી ગુનો નોંધવા તજવીજ હાથ ધરી હોવાનું સીટી ડિવાયએસપી આર.આર.સિંઘાલે જણાવ્યું હતું. સાંઢિયાવાડ વિસ્તારમાં આજે સાંજના સમયે એલસીબી, એસઓજી, પેરોલ ફર્લો સહિતના મસમોટા કાફલા સાથે ભાવનગર પોલીસે હાથ ધરેલા ઓપરેશન લોકોમાં ચર્ચાનો વિષય બન્યું હતું.
