આ પણ વાંચો ટ્રેન્ડિંગ સમાચાર
Sayla Student Top 10 Gujarat: કહેવાય છે કે જો મનમાં કંઈક કરી છૂટવાની તમન્ના હોય, તો ગરીબી કે અંતરિયાળ વિસ્તાર ક્યારેય આડે આવતા નથી. આ વાતને સાચી સાબિત કરી બતાવી છે સાયલા તાલુકાના ગરાંભડી ગામના એક તેજસ્વી તારલાએ. ખેતી પર નિર્ભર પરિવારમાંથી આવતા અક્ષય કુકડીયાએ ધોરણ-10ની પરીક્ષામાં સમગ્ર ગુજરાતમાં ટોપ-10માં સ્થાન મેળવીને સાયલા પંથકનું નામ રોશન કર્યું છે.
સંજોગો નહીં, મહેનત બોલે છે
ગરાંભડી ગામના ખેડૂત પ્રવીણભાઈના પુત્ર અક્ષય પ્રવીણભાઈ કુકડીયાએ ધોરણ-10ના પરિણામમાં 99.92 PR મેળવ્યા છે. અક્ષયે સમગ્ર ગુજરાતમાં 8મો રેન્ક હાંસલ કરીને સાબિત કરી દીધું છે કે સંઘર્ષ ભલે ગમે તેટલો હોય, પણ સખત મહેનતનું ફળ હંમેશા મીઠું મળે છે. સખત પરિશ્રમનો કોઇ વિકલ્પ નથી.
અંતરિયાળ ગામથી સફળતાના શિખર સુધી
અક્ષય બોટાદ જિલ્લાના સાકરડી ખાતે અભ્યાસ કરતો હતો. એક સામાન્ય ખેડૂત પરિવારમાંથી આવતો હોવા છતાં, અક્ષયે ક્યારેય સુવિધાઓનો અભાવ નડવા દીધો નથી. તેની આ અદભૂત સિદ્ધિ બદલ ગરાંભડી ગામમાં ખુશીનો માહોલ જોવા મળી રહ્યો છે. પરિવારજનો અને ગ્રામજનોએ તેને અભિનંદન પાઠવી મોઢું મીઠું કરાવ્યું હતું. માત્ર પરિવાર જ નહીં, પરંતુ સમગ્ર સાયલા પંથક માટે ગૌરવની ક્ષણ છે. ખેતીકામ કરતા પિતા અને અંતરિયાળ વિસ્તારમાં રહીને મેળવેલી આ સફળતા આજે અનેક વિદ્યાર્થીઓ માટે પ્રેરણાસ્ત્રોત બની છે.
