આ પણ વાંચો ટ્રેન્ડિંગ સમાચાર
મિડલ ઇસ્ટમાં યુદ્ધની સ્થિતિથી ગેસના પૂરવઠાને અસર
ઘરેલું સિલિન્ડર માટે ૩૦ દિવસનું વેટિંગ ઃ ગેસ વિતરણ વ્યવસ્થા ખોરવાતા એજન્સીઓ પર ગ્રાહકો સાથે ઘર્ષણની સ્થિતિ
સુરેન્દ્રનગર – સુરેન્દ્રનગર જિલ્લામાં છેલ્લા એક અઠવાડિયાથી રાંધણ ગેસ અને કોમશયલ ગેસની તીવ્ર અછત સર્જાતા સામાન્ય જનતા સહિત ઉદ્યોગ જગતની હાલત કફોડી બની છે. ઈરાન, ઈઝરાયેલ અને અમેરિકા વચ્ચે ચાલી રહેલા યુદ્ધની સીધી અસર ગેસના પુરવઠા પર જોવા મળી રહી છે. સ્ટીમર મારફતે આવતો ગેસનો જથ્થો અટકી પડતા સુરેન્દ્રનગર જિલ્લાના ડેપો પર છેલ્લા સાત દિવસથી કોમશયલ સિલિન્ડરની ફાળવણી જ કરવામાં આવી નથી.
બીજી તરફ, ઘરેલું ગેસના ગ્રાહકોને પણ મોટો ઝટકો લાગ્યો છે. હવે એક સિલિન્ડર લીધા બાદ નવું રજિસ્ટ્રેશન કરાવવા માટે ફરજિયાત ૩૦ દિવસની રાહ જોવી પડશે. આ વેટિંગ પિરિયડને કારણે ગૃહિણીઓ મુશ્કેલીમાં મુકાઈ છે. ગેસ એજન્સીઓ પર સિલિન્ડર લેવા માટે પડાપડી થઈ રહી છે, જેના કારણે એજન્સી સંચાલકો અને ગ્રાહકો વચ્ચે ઉગ્ર બોલાચાલી અને ઘર્ષણના બનાવો વધી રહ્યા છે.
કોમશયલ ગેસના અભાવે કાળાબજારની બૂમ (બોક્સ)
કોમશયલ સિલિન્ડર ન મળતા રેસ્ટોરન્ટ, હોટલ, પાણીપુરીના ધંધાર્થીઓ અને સોની બજારના કામદારોના કામ અટકી પડયા છે. મોટી ફેક્ટરીઓમાં ઉત્પાદન પ્રક્રિયા ખોરવાઈ છે. બજારમાં સ્ટોકની અછતનો લાભ ઉઠાવી કેટલાક તત્વો દ્વારા સિલિન્ડરના કાળાબજાર કરવામાં આવતા હોવાની ફરિયાદો પણ ઉઠી છે. જો આ પરિસ્થિતિ લાંબો સમય ચાલશે તો અનેક નાના ઉદ્યોગો બંધ થવાની ભીતિ સેવાઈ રહી છે.
સિરામિક હબ ગણાતા થાનગઢના ઉદ્યોગોને મોટો ફટકો (બોક્સ)
સુરેન્દ્રનગર જિલ્લો સિરામિક ઉદ્યોગનું કેન્દ્ર છે. ખાસ કરીને થાનગઢ વિસ્તારમાં આવેલા એકમોને ગેસની સતત જરૃરિયાત રહે છે. જોકે, સરકાર દ્વારા ગેસ સપ્લાયમાં કાપ મૂકીને માત્ર ૧૫ દિવસ જ ગેસ આપવાનો નિર્ણય લેવાતા સિરામિક એકમો પર જોખમ તોળાઈ રહ્યું છે. સીએનજી અને એલપીજી બંનેના પુરવઠામાં કાપ આવતા પરિવહન ક્ષેત્રે પણ અસર જોવા મળી રહી છે.
પૂરતો સ્ટોક અને સર્વરના ધાંધિયાથી વિતરણ વ્યવસ્થા ખોરવાઇઃ એજન્સી (બોક્સ)
ભારત ગેસના વિક્રેતા પીસી બ્રધર ગેસ એજન્સીના સંચાલક ઉમંગસિંહ પરમારે જણાવ્યું હતું કે, ‘ઉપરથી જ પૂરતો સ્ટોક ફાળવવામાં આવતો નથી. વળી, સર્વર ડાઉન હોવાને કારણે બિલિંગ અને ઓટીપી જનરેટ થવામાં સમસ્યા નડે છે, જેના કારણે વિતરણ વ્યવસ્થા ખોરવાય છે. સ્ટોક ન હોવાથી અમે ગ્રાહકોને સિલિન્ડર આપી શકતા નથી, જે ઘર્ષણનું મુખ્ય કારણ બને છે.’
