West Bengal Rajya Sabha Election 2026 : પશ્ચિમ બંગાળમાં આગામી રાજ્યસભા ચૂંટણીને ધ્યાને રાખીને તૃણમૂલ કોંગ્રેસ (TMC)એ ચાર ઉમેદવારના નામ જાહેર કર્યા છે. ટીએમસીની આ યાદીમાં પૂર્વ કેન્દ્રીય મંત્રી બાબુલ સુપ્રિયો, પૂર્વ પોલીસ કમિશનર રાજીવ કુમાર, સુપ્રીમ કોર્ટના વરિષ્ઠ વકીલ મેનકા ગુરુસ્વામી, બંગાળી ફિલ્મની અભિનેત્રી કોયલ મલ્લિકને સામેલ કર્યા છે.
BJP છોડી TMCમાં જોડાનારા નેતાને રાજ્યસભાની ટિકિટ
પૂર્વ કેન્દ્રીય રહી ચુકેલા બાબુલ સુપ્રિયોએ વર્ષ 2021માં ભાજપ છોડીને TMCમાં જોડાઈ ગયા હતા. હાલ તેઓ વર્તમાન રાજ્ય સરકારમાં મંત્રી અને ધારાસભ્ય છે. જ્યારે પશ્ચિમ બંગાળના પૂર્વ પોલીસ મહાનિદેશક અને કોલકાત પોલીસ કમિશનર રહેલા રાજીવ કુમાર તાજેતરમાં જ નિવૃત્ત થયા છે. તેમણે ચર્ચાસ્પદ કેસોમાં મહત્ત્વની ભૂમિકા ભજવી હોવાનું કહેવાય છે.
આ પણ વાંચો : અફઘાનિસ્તાનનો દાવો- ઈસ્લામાબાદમાં ઘૂસીને એરસ્ટ્રાઈક કરી, પાકિસ્તાને કહ્યું- અમે 274 લડાકૂ માર્યા
બંગાળી ફિલ્મની અભિનેત્રીની રાજકારણમાં એન્ટ્રી
આ ઉપરાંત ટીએમસીએ સુપ્રીમ કોર્ટના વરિષ્ઠ વકીલ મેનકા ગુરુસ્વામીનું નામ ઉમેદવાર તરીકે પસંદ કર્યું છે. મેનકાએ અનેક મહત્ત્વના કેસોમાં દલીલો રજૂ કરી છે. પાર્ટીએ બંગાળી ફિલ્મની લોકપ્રિય અભિનેત્રી કોયલ મલ્લિકનું નામ જાહેર કર્યા બાદ હવે તેમની સત્તાવાર રાજકારણમાં એન્ટ્રી થઈ છે.
10 રાજ્યોના 37 રાજ્યસભા બેઠકો પર 16 માર્ચે મતદાન
પશ્ચિમ બંગાળ વિધાનસભામાં ટીએમસી પાસે સ્પષ્ટ બહુમતી છે, તેથી રાજ્યસભા ચૂંટણીમાં ટીએમસીનું ચારમાંથી ત્રણ બેઠકો જીતવાનું લગભગ નક્કી છે. જ્યારે બાકીની એક બેઠક વિપક્ષને મળવાની સંભાવના છે. ચૂંટણી પંચે 10 રાજ્યોના 37 રાજ્યસભા બેઠકો પર 16 માર્ચે મતદાન યોજવાની જાહેરાત કરી છે.
આ પણ વાંચો : નેપાળમાં ચૂંટણી : ભારત-નેપાળ સરહદ ચાર દિવસ માટે થશે બંધ, મેડિકલ ઈમરજન્સીમાં છૂટ
